Það sem má og ekki má

Höfundur: Magnea J. Matthíasdóttir

Myndin er fengin að láni héðan

Skoðanakúgun femínista og almennur yfirgangur hefur verið mörgum innblástur til að stinga niður penna síðustu mánuði og ár og jafnvel lengur. Skeleggir baráttumenn fyrir frelsi einstaklingsins hafa verið óþreytandi við að benda á kvenrembuna og ískyggileg ítök þessarar samstilltu öfgahreyfingar á öllum sviðum mannlífsins, jafnvel svo að helstu ráðamenn þjóðarinnar, jafnt innan löggjafarvalds sem dómskerfis, þora sig ekki að hreyfa án samþykkis hennar. Nú er það svo, að margir óttast að vera að ósekju taldir til „góða fólksins“ og þora því ekki að láta skoðanir sínar í ljós opinberlega, svo að mér þótti réttast að taka saman stuttar leiðbeiningar til að jafnréttissinnar rati síður á villigötur og verði ekki saklausir úthrópaðir sem femínistar í umræðunni.

Umræðuefni: Vændi

Heimilt er að vera andvígur vændi, þó með þeim formerkjum að sú andstaða eigi einungis við um börn og konur sem hafa sannanlega verið seldar ánauðugar í vændisþjónustu. Hafa ber í huga að flestar konur stunda vændi af áhuga og ánægju og hamingjusamar hórur eru á hverju strái. Vændi er eins og hver önnur atvinnugrein, viðkunnanlegri og þrifalegri en mörg önnur þjónustustörf sem konum standa til boða, t.d. ræstingar og umönnun sjúkra og aldraðra. Konur hafa fullan rétt á að selja sig í vændi og ef þær kjósa að deila innkomunni af þeim gríðarháu launum sem þær hafa upp úr því með öðrum og halda ekki nema hluta eftir sjálfar er það einnig þeirra val. Innan samfélagsins viðgengst hins vegar að starfrækja stofnanir sem leitast við að telja vændiskonum trú um að starf þeirra sé niðurlægjandi og mannskemmandi og hvetja þær til að hætta í vændi, án þess að taka nokkurt tillit til augljósra mannréttinda vændiskaupandans til að stunda hvers kyns kynlíf sem honum hugnast hvenær sem er gegn hóflegri þóknun. Þessar stofnanir og starfsemi þeirra ber að draga í efa.

Varast ber að nefna: vændi karlmanna (nema í rökþroti eða til að beina umræðu annað); kynsjúkdóma og ofbeldi; sálrænar afleiðingar vændis; strippstaði og undirheimastarfsemi.

Munið: að hafa ævinlega traustar heimildir á reiðum höndum, nánar tiltekið nýlegar ritrýndar skýrslur aðila sem eru sannanlega ekki femínistar eða hafa tilhneigingar til femínisma.

Best væri: að vera fylgjandi frjálsu vændi.

Umræðuefni: klám

Heimilt er að vera andvígur klámi, þó aðeins barnaklámi og hugsanlega mjög ofbeldisfullum myndböndum sem fjalla sannanlega um nauðganir og hrottalegar misþyrmingar. Hafið þó hugfast að þið eruð ekki dómbær á hvað sé hrottalegt og munið að klámmyndaleikarar fá greitt fyrir sína vinnu. Það eru sjálfsögð mannréttindi hvers og eins að hafa frjálsan aðgang að klámi og að klámmyndaleikarar stunda þessa vinnu af áhuga og ánægju, auk þess að fá greitt fyrir hana. Klámmyndaiðnaðurinn veltir gríðarlegum upphæðum og er góður fyrir hagkerfið. Sjá einnig um stofnanir sem berjast gegn vændi hér að ofan.

Varast ber að nefna: frásagnir fyrrverandi klámmyndaleikara um hvað pornóbransinn sé miskunnarlaus og mannskemmandi; kynsjúkdóma og klámmyndaleikara sem hafa smitast af alnæmi; mansal og ofbeldi; almenna klámvæðingu samfélagsins, enda er hún þjóðsaga sem kynlífssveltir femínistar hafa komið á kreik.

Munið: að hafa ævinlega traustar heimildir á reiðum höndum, nánar tiltekið nýlegar ritrýndar skýrslur aðila sem eru sannanlega ekki femínistar eða hafa tilhneigingar til femínisma.

Best væri: að vera fylgjandi klámi.

Umræðuefni: útlit og tíska

Hér er frelsi manna til að tjá sig talsvert mikið, svo framarlega sem þeir eru almennt hlynntir rakstri á líkamshárum (handarkrikar, fótleggir, kynfæri). Persónulegur smekkur má ráða ferðinni og sjaldan þarf að reiða fram heimildir, en þó eru nokkur atriði sem ber að hafa í huga:

• Hvers kyns fegrunaraðgerðir eru einungis til þess fallnar að auka sjálfstraust og bæta sjálfsímynd kvenna sem ekki eru nógu fallegar frá skaparans hendi. Brjóstastækkanir eru sjálfsagður hlutur og góð útskriftargjöf, en menn ættu að hugsa sig um og kanna undirtektir áður en þeir gefa hana í fermingargjöf.
• Feitt er ljótt. Ef fólk er feitt er það líka heilsulaust og skortir sjálfsaga.
• Gamalt er hallærislegt, nema það sé keypt í vintage-búðum. Gamalt fólk er alltaf hallærislegt, einkum konur.
• Föstukúrar eru hollir og dítox nauðsynlegt til að hreinsa líkamann.
• Þeir sem raka ekki af sér kynhárin eða uppræta þau með öðrum hætti eru sóðar.
• Náttúrulegt litaval, einkum í klæðnaði barna, er bleikt (stelpur) og blátt (strákar). Stelpur hafa líka meðfædda, eðlislæga þörf fyrir pífur og blúndur.
• Klámvæðing í tísku og samfélagi er þjóðsaga. (Hér dugar ekki einu sinni að reiða fram ritrýndar skýrslur og heimildir, því allir sem halda öðru fram eru sannanlega femínistar, þó að ekkert annað bendi til þess.)

Varast ber að nefna: allt sem bendir til þess að viðteknar fegurðarhugmyndir séu ekki hinar einu réttu og að tíska og smekkur hafi breyst í gegnum aldirnar.

Munið: að lífsstílsdálkar fjölmiðla, einkum netmiðla, eru einungis ætlaðir í þágu lesenda en ekki auglýsenda og markaðskerfisins. Ráðin sem þar eru gefin um útlit og tísku, smekk og heilsu, eru gefin af góðum hug en ekki til að selja eitt eða neitt.

Best væri: að gagnrýna aldrei neitt sem er í tísku og/eða hefur hlotið náð fyrir augum helstu tískuspekinga og heilsugúrúa samtímans.

Önnur umræðuefni

Til að flækja málin ekki óþarflega er hér stutt upptalning á réttri afstöðu til nokkurra annarra umræðuefna sem kann að bera á góma.

Fylgjandi: bættum réttindum feðra; minni launamun kynjanna; sérstöku átaki til að auka ánægju drengja í námi.

Á móti: kynjakvóta; skeleggum (les.: frekum) stjórnmálakonum; dómum yfir mönnum fyrir nauðganir nema í sérstökum tilvikum (t.d. þegar vitni eru að atvikinu eða áverkar á þolanda eru sannanlega vegna nauðgunar en ekki „röff“ kynlífs).

Veðrið er af reynsluboltum talið öruggasta umræðuefnið í heiminum

Forðast að nefna:feðraveldið; útlitskúgun; laskaða sjálfsmynd unglinga, einkum stúlkna; klámvæðingu; ofbeldisfulla tölvuleiki; búrkur og múslimskar konur (nema í rökþroti um  stöðu kvenna og til að beina umræðunni að öðru); staðgöngumæðrun; fóstureyðingar (nema þá algjörlega pro-life).

Örugg umræðuefni:líkamsrækt (fylgjandi); snyrtivörur (konur); bílar (karlar); íþróttir (karlar; þó mega konur hafa skoðanir á fimleikum, listskautum og kvennahandbolta); börn (skemmtisögur og hnyttin tilsvör); nýjar bíómyndir (konur: rómantískar gamanmyndir; karlar: þrillerar og spennumyndir); sjósund og fjallgöngur (fylgjandi).

Eina ALGJÖRLEGA örugga umræðuefnið: veðrið.